Türkmen agyr atletikaçylary Peruwyň paýtagty Lima şäherinde tamamlanan ýetginjekleriň (U17) we ýaşlaryň (U20) arasynda geçirilen dünýä çempionatynda 12 medal, ýagny 2 altyn, 7 kümüş we 3 bürünç medal gazandylar. Bu barada türkmen resmi neşirleri 8-nji maýda habar berdi.
Maglumatda 1-6-njy maý aralygynda geçirilen çempionata 77 ýurtdan gelen 531 türgeniň gatnaşandygy, şeýle-de Türkmenistana ýedi agyr atletikaçynyň, ýagny ýaşlaryň ýaryşynda 4 oglanyň we ýetginjekler ýaryşynda 3 gyzyň wekilçilik edendigi aýdylýar.
Geçen ýyl Türkmenistanyň Agyr atletika boýunça federasiýasyna, gadagan edilen kuwwatlandyryjylar, ýagny doping babatdaky düzgünleri sistematiki ýagdaýda bozandygy üçin, $80 müň möçberinde jerime salnandygy barada maglumatlar peýda bolupdy.