ABŞ-nyň döwlet sekretary Marko Rubio 29-njy aprelde eden çykyşynda, eger-de Russiýa bilen Ukraina urşy bes etmek boýunça anyk meýilnamalary hödürlemese, Birleşen Ştatlaryň araçylyk tagallalaryny çäklendirjekdigini duýdurdy.
Döwlet departamentiniň metbugat wekili Temmi Brýus Rubionyň “bu konfliktiň nädip tamamlanmalydygy barada iki tarapyň anyk teklipleri hödürlemeli wagty ýetdi” diýen sözlerini sitirledi.
“Eger ilerleme bolmasa, ABŞ bu prosesde araçy hökmünde çekiler” diýip, Brýus žurnalistlere aýtdy.
Şol gün, ýagny 29-njy aprelde, BMG-niň Howpsuzlyk Geňeşiniň mejlisinde çykyş eden amerikan diplomaty Jon Kelli dowam edýän gan dökülmelere Russiýanyň jogapkärdigini aýtdy. Ol Russiýanyň “gynansak-da, görnükli zarbalar bilen günäsiz raýatlaryň hem ölümine sebäp bolandygyny” belledi.
“Russiýanyň häzir durnukly parahatçylygy gazanmak üçin uly mümkinçiligi bar” diýip, Kelli aýtdy. Şol bir wagtyň özünde, ol urşy bes etmek jogapkärçiliginiň Russiýa bilen Ukrainanyň üstünde durýandygyny nygtady.
“Parahatçylyk mümkinçilikleri bu iki ýurduň liderlerine bagly. Eger iki tarap hem urşy bes etmäge taýýar bolsa, ABŞ olaryň durnukly parahatçylyga barýan ýoluny doly goldar” diýip, ol aýtdy.
ABŞ-nyň prezidenti Donald Tramp hem ABC telekanalyna beren interwýusynda Russiýanyň prezidenti Wladimir Putiniň Ukrainadaky urşy bes etmegi isleýändigine ynanýandygyny aýtdy. “Meniň pikirimçe, isleýär” diýip, Tramp 29-njy aprelde efire berlen interwýuda aýtdy.
Putin 28-nji aprelde Sowet Soýuzynyň we onuň ýaranlarynyň Ikinji jahan urşunda gazanan ýeňişiniň 80 ýyllygyny bellemek üçin 8-10-njy maý aralygynda üç günlük ýaraşyk yglan etdi.
Ukrainanyň prezidenti Wolodymyr Zelenski bu ýaraşyga näme sebäpden garaşmalydygyny soraga aldy, şeýle-de “gaýra goýulmazdan doly we şertsiz” 30 günlük ýaraşygy teklip etdi.
Tramp we onuň wekilleri Ukrainany ýaraşyga razy etmäge synanyşýarlar. Şol bir wagtyň özünde, Tramp Russiýany Ukraina garşy hüjümlerini bes etmäge çagyrýar. ABC bilen bolan söhbetdeşlikde Tramp: “Putiniň birnäçe şähere we obalara raketa atanyny göreninde, munuň bilen hoşal bolmandygyny” aýtdy.
Howpsuzlyk Geňeşindäki çykyşlarynda Fransiýa bilen Britaniýa ABŞ-nyň araçylyk tagallalaryny makulladylar we Russiýany tankytladylar. Russiýa 29-njy aprelde giçlik Ukrainanyň Dnipro we Harkiw şäherlerine täze dron hüjümlerini amala aşyrdy.
Forum