Ysraýylyň harbylary sişenbe gününe geçilen gije Gaza zolagyndaky nyşanalara howa hüjümlerini amala aşyrdy diýip, habar gulluklary maglumat berýär. Goranmak ministri Israel Katz Ysraýylyň “söweş operasiýalaryny dowam etdirýändigini” aýtdy.
Premýer-ministr Benjamin Netanýahu ýaraşyk ylalaşygynyň möhletiniň uzaldylmagy boýunça gepleşiklerde öňe gidişligiň bolmazlygy sebäpli, howa zarbalaryny amala aşyrmagy buýruk berendigini aýtdy.
“Biziň zamunlarymyz öýlerine dolanýança, hem-de biz uruşdaky ähli maksatlarymyzy amala aşyrýançak uruşlar bes edilmez” diýip, Goranmak ministrliginiň beýanatynda aýdylýar.
Birleşen Ştatlar we Ýewropa Bileleşigi tarapyndan terror guramasy hökmünde kesgitlenen Hamas Ysraýylyň ýaraşyk ylalaşygyny bozmagynyň “Gazadaky tussaglaryň” ykbalyna howp abandyrýandygyny aýtdy,
Ak tamyň metbugat sekretary Karoline Leawit howa zarbalaryny urmak babatynda Ysraýylyň Tramp administrasiýasyna öňünden habar berendigini aýtdy.
Habar gulluklary ysraýyl çeşmelerini sitirläp, zarbalaryň orta derejeli Hamas komandirlerini, topar ýolbaşçylaryny hem-de infrastruktura desgalaryny nyşana alandygyny aýtdy. Olar bu operasiýalaryň howa zarbalary bilen çäklenmejekdigini aýdýarlar.
Bu uruşlar ýaraşyk ylalaşygynyň güýje girmeginden iki aý soňra gaýtadan başlanýar. Şol ýaraşyk esasynda, Hamas Ysraýylyň türmelerinde saklanýan 2000 çemesi palestin tussagynyň öwezine otuzdan gowrak ysraýyl zamunyny boşatmaga razy bolupdy. Ýaraşygyň birinji tapgyry iki hepde ozal tamamlandy, ikinji tapgyr boýunça gepleşikler, şol sanda altmyş çemesi zamunyň – şolardan tas ýarysynyň diri bolandygyna ynanylýar – boşadylmagy, şeýle-de, urşy soňlamak boýunça gepleşikler togtady.