Türkmenistandan Azerbaýjana getirilen pomidorlarda howply wirus ýüze çykarylandan soň, olaryň ýurduň içerki bazaryna goýberilmegi gadagan edildi.
1news.az neşiriniň 21-nji apreldäki maglumatyna görä, meýilleşdirilen barlaglaryň çäginde 56 tonna import edilen pomidorlardan nusgalar alyndy we laboratoriýa barlaglarynyň netijesinde zyýanly ‘Tomato brown rugose fruit virus’ wirusy ýüze çykaryldy.
Geçen hepde Russiýanyň Ýekaterinburg şäheri boýunça Rosselhoznador edarasy, şol sanda Türkmenistandan getirilen pomidorlarda ýokarda agzalan wirusyň ýüze çykarylmagy sebäpli, bu önümi ýurduň çägine goýbermedi.
Apreliň başynda Rosselhoznadoryň Orenburg oblasty boýunça edarasy Türkmenistandan getirilen, umumy agramy 36 tonna barabar dört tapgyr pomidorlarda, howply karantin organizmleriniň tapylmagy zerarly, olaryň getirilmegini gadagan etdi.
Türkmenistandan daşary ýurtlara eksport edilen pomidorlarda zyýanly möjekleriň tapylýandygy barada ozal hem habarlar peýda bolupdy.
Türkmenistanyň oba hojalyk resmileri daşary ýurtlara eksport edilýän gök-bakja önümlerinde karantin organizmleriniň, şol sanda zyýankeş mör-möjekleriň, howply wiruslaryň tapylmagy baradaky habarlar boýunça beýanat bermeýär.