Türkmenistanyň prezidenti Serdar Berdimuhamedow Balkan welaýatynyň Balkanabat şäherine we Daşoguz welaýatynyň Görogly etrabyna täze häkimleri wezipä belledi. Prezident bular baradaky permanlara Ministrler Kabinetiniň 3-nji martda geçirilen iş maslahatynyň dowamynda gol goýdy.
Permana laýyklykda, Maksat Ataberdiýewiç Paşanakow Balkan welaýatynyň Balkanabat şäheriniň häkimi wezipesine bellenilip, Balkan welaýatynyň häkimliginiň iş dolandyryjysy wezipesinden boşadyldy.
Munuň bilen bir wagtda, Balkanabat şäheriniň häkiminiň orunbasary Myrat Nazarow Balkanabat şäheriniň häkiminiň wezipesini wagtlaýyn ýerine ýetirmekden boşadyldy.
Türkmen lideri Bäşimdurdy Jumaýewiç Mämedowy Daşoguz welaýatynyň Görogly etrabynyň häkimi wezipesinden boşadyp, bu wezipä Kakamyrat Gutlyýewiç Orazgulyýewi belledi. Orazgulyýewiň öňki wezipesi barada hiç zat aýdylmaýar.
Türkmenistanyň oba hojalyk toplumynda we ýurduň sebitlerinde alnyp barylýan işler bilen bagly meselelere garalan maslahatda kadr çalşygynyň sebäbi düşündirilmedi.